ராஜா ராணி - கதை

ஒரு அறிமுக இயக்குனரிடமிருந்து எதிர்பாராத.. குடும்ப வாழ்வியல் குறித்த கதையம்ஸம் கொண்ட படைப்பு.

 

உருகி நேசித்த காதலன் ஜெய்’யை கண்காணாத தேசத்தில் இறந்துபோனதை நினைத்தே வாழும் காதலி நயந்தாரா அப்பாவின் கட்டாயத்தினாலும்..  கண்முன்னரே காதலியை(நஸ்ரியா) விபத்தில் பறிகொடுத்த காதலன் ஆர்யா, நண்பரின் வற்புறுத்தலாலும் திருமணம் செய்துக்கொண்டால் திருமணவாழ்வு எப்படி இருக்கும்?

வெறுப்பில் ஒருவரை ஒருவர் பாராமுகமாக., மூன்றாம் ஜீவனாக நடத்திக் கொண்டிருக்கையில் திடீரென்று நயனுக்கு இருக்கும் வலிப்பு நோயை பார்த்து பதறுகிறார் ஆர்யா. 

அங்கு நயனின் மூலமாகவே அவரின் பழைய காதல் கதையை கேட்டு மனம் மாறி அவரை நன்கு அறிந்துக்கொள்ள முற்படுகிறார். ஆனால் நயன் அதனை முன்பு போலவே உதாசீனப்படுத்த இருவருக்குமான விரிசல் நீடிக்கிறது. 

அதற்குபின்னர் அவர்கள் உறவில் மாற்றம் உண்டாக காரணம் என்ன.. இருவரும் இணக்கம் ஆனார்களா என்ற கேள்விகளுடன்  நீள்கிறது கதை.

நயனின் அப்பாவாக சத்யராஜ். டார்லிங் டார்லிங் என மகளும் அப்பாவும்  ஒருவரை ஒருவர் விளித்துக்கொள்வதிலேயே மகள்மீதான அன்பை நமக்கு எளிதில் உணர்த்திவிடுகிறார் இயக்குனர்.  ந’ச்’ரியா.. நயன்தாரா இருவரும் பங்களிப்பை நிறைவாக செய்துள்ளனர்

காட்சிகளும் கதைக்களமும் பழகிய பாதையிலேயே போவதால் அங்கங்கே லேசான சலிப்பு வருதலுக்கான சாத்தியக்கூறுகள் தெரிகிறது.

கதைக்காக காட்சிகள் வலிந்து திணிக்கப்பட்டதுபோல் தெரிவதும் படத்திற்கான குறைபாடுகளுள் ஒன்று.

ஜி.வி ப்ரகாஷ் இசையில் ’ஏய் பேபி’ பாடல் அட்டகாசம் ஊடாக கானா பாலாவின் வரிகள் ஸ்பெஷல் ஜிகர்தண்டா.

அதிகமாக விமர்சன சுழலுக்குள் சிக்காமல் ஒரு மாதிரியாக நழுவிக்கொண்டு சென்று பார்ப்பவர்கள் மனதில் தனக்கென்று ஒரு இடத்தை பிடித்துக்கொள்கிறார்கள் ராஜாவும் ராணியும். 

புது இயக்குனர்களின் நடுவே தனிமுத்திரை பதிக்காவிட்டாலும் இது குடும்ப வாழ்க்கையினை துவங்கும் அனைவருக்கும் ஒரு ’மாதிரி’ கதையினை வார்த்துக்கொடுத்த வகையில் அட்லீ அசத்தல் ’லீ’தான்.

ஒநாயும் ஆட்டுக்குட்டியும் - மறு(ப்பில்லா)பார்வை!

தனிமை ஓநாயின் ஓலம்..

ஒரு வகையில் இது தனிமை படுத்தப்பட்ட / தனித்து விடப்பட்டு.. பின்னர் எதிரிகளால் விரட்டி விரட்டி வேட்டையாடப்படும் ஓநாய், திரும்பி நின்று எதிர்த்து நின்று வேட்டையாடி, மாரில் அறைந்து அறைகூவலாய் ஓலமிடும் ஓசைதான் இந்த ஓநாயும் ஆட்டுக்குட்டியும்.

’முகமூடி’யில் சந்தர்ப்ப சூழல்களால் நினைத்ததை நினைத்தபடி எடுக்கமுடியாமல் போய், பல்வேறு எதிர்ப்புக் கணைகளையும் நெகட்டிவ் விமரிசனங்களையும் மாரில் வாங்கிய வலியோடு தன் விஸ்வரூபத்தினை காட்ட மிஸ்கின் எடுத்த அவதாரம் இந்த ஓநாய் வடிவம்.   

வில்லன்களாலும், போலீஸாராலும் தேடப்படும் மோஸ்ட் வாண்ட்டட் க்ரிமினல், தன் தவறுகளுக்கு பிராயச்சித்தமாக தன்னால் பாதிக்கப்பட்ட ஒரு குடும்பத்தை காப்பாற்றி அவர்களோடே தன் மீத வாழ்வினை வாழ்ந்திட முனையும் போராட்டம்தான் கதை. 

மிஸ்கினின் வழக்கமான பாணியில் ’ஹாஃப் வே’ ஓப்பனிங்கில் படம் துவங்குகிறது. குண்டடிப்பட்டு சாலையில் கிடக்கும் ’வுல்ஃப்’ என்று அழைக்கப்படும் எட்வர்டை (மிஸ்கின்) மருத்துவ கல்லூரி மாணவர் ’ஸ்ரீ’ காப்பாற்றுகிறார். அதுவே அவருக்கு வினையாக அமைய, போலீஸ், சிபிசிஐடி என இரு தரப்பினரும் அவரை வைத்தே ’வுல்ஃபை’ பிடிக்க திட்டம் போடுகின்றனர்.

ஸ்ரீ ஏன் அவரை ’108’ அவசர உதவிக்கு அழைக்காமல் அங்குமிங்கும் அல்லாடுகிறார் என்ற  சின்ன லாஜிக் நெருடலுடன் திரைக்கதையை துவக்கினாலும் மீதமுள்ள நிமிடங்களில் நம்மை கதையின் உள்ள்ள்ள்…ளே  இழுத்துப்போடும் லாவக வித்தைக் கற்ற இயக்குனரிடம் மோதி இந்த லாஜிக் ராக்கெட் சின்னாபின்னமாகிறது.

முன்கதை ஒன்றைச் சுற்றியே கதை பின்னப்பட்டிருப்பதால் எல்லோரின் கவனமும் அட்டகாசமான ஆக்‌ஷன் ஃப்ளாஷ்பேக்கை எதிர்பார்த்திருக்கையில், அந்த கதையினையே கல்லறையில் ஈரம் காயாத சவக்குழி முன்பாக நிலைக்குத்திய விழிகளோடு, வார்த்தைகளாலேயே விரித்துரைக்கும் பொழுது மொத்த தியேட்டரும் நிசப்தமாகி, கதையினை சொல்லிமுடித்து எட்வர்ட் கண்ணீர் விடுகையில் கண்ணீருடன் கை தட்டாதவர்களை விரல்விட்டு எண்ணிவிடலாம். ஃப்ளாஷ்பேக்கை சிக்ஸ்பேக்கைவிட முக்கியமாக கருதும் தமிழ் ரசிகர்களுக்கு இப்படி க்ளீன் ஓரல் நரேஷன் மூலம் சொல்லத்துணிந்த தைரியம்.. ஆச்சர்யம்தான். சபாஷ் இயக்குனரே. 

எதிர்பார்க்காத தருணத்தில் சுடப்படும்போது சுடப்பட்டவர் உதிர்க்கும் ‘சண்டாளா!’ போன்ற ஒற்றை வசனங்கள் என்னைப் போன்ற காமிக்ஸ் பிரியர்களுக்கு மட்டுமே பரிச்சயமானவை. ஆனால் அதனையும் தியேட்டர் ரசிகர்கள் கைதட்டி ரசித்தது ஆச்சர்யப் புதிராகவே இருந்தது.

கடைசியில் குழந்தையை ட்ராலியில் தள்ளிக்கொண்டு போகையில் மறைந்திருக்கும் எதிராளியை யதார்த்தமாய் திரும்பிப்பார்த்து சுடுவது போன்ற ஹாஸ்யங்கள் கைத்தட்டல்களை அள்ளுகின்றன.

காட்சிகளின் பலவிஷயங்கள் நமது கணிப்பிற்கே விடப்படுகின்றன.

அந்நியமான காட்சி அமைப்புகள், வழக்கமான சினிமா பாணியில் அல்லாத பெயர் தெரிவுகள் என்று இருந்தாலும் அந்த வட்டத்தினுள் நம்மை இழுத்துச்சென்று கதை சொல்லுவதால் அது உறுத்தாமல் இருக்கிறது.

வழக்கமாய் பாத்திரங்களுக்கான எக்ஸ்ட்ரீம் க்ளோஸ் அப் காட்சிகளை தவிர்க்கும் இயக்குனர் இதில் அந்த கட்டுப்பாட்டுக்கு விலக்கு அளித்துள்ளார்.

ஒரு க்ரைம் திரில்லருக்கான ஷரத்துக்கள் அனைத்தையும் உள்ளடக்கிய இந்த படம் வளரும் இயக்குனர்களுக்கு நிச்சயமாய் ஒரு முன்மாதிரி.

இளையராஜா… இசைதேவன்.. சொல்லியும் தெரியவேண்டுமா.. இந்த படத்தின் பின்னணி இசை எல்லாவற்றிற்கும் மேல் வெகு சிறப்பு.  பார்வையாளனின் கவனத்தை திசைத்திருப்பாது, காதுகளை பதம் பார்க்காது, அவசியப்படுகையில் தன் இருப்பை உணர்த்தும் இசையப்பாளர் இந்த இசைதேவன் தன் அனுபவ பங்களிப்பை நிறைவாய் செய்திருக்கிறார்.

கத்தாழை கண்கள் கொண்ட கன்னித்தீவுப் பெண்களின் நடனம் மிஸ்ஸிங்கு.

கேரக்டர்கள் கனகச்சிதம், வழக்கமாக எல்லா பாத்திரங்களும் ஒரே பாடி லேங்குவேஜில் இயங்கும் மிஸ்கின் படங்களில் இருந்து இந்த படத்தில் ஸ்ரீ, இன்ஸ்பெக்டர் பிச்சை, சிபிசிஐடி அதிகாரி என அனைவரிடமும் தத்தமது இயல்புகளிலேயே வேலை வாங்கியிருப்பதும் கொஞ்சம் புதிதுதான்.

ட்விட்டர் சமூக தளத்தில் ஒருவர் எழுதியிருந்தார் இப்படி “இறைவா தயவு எப்படியாவது இளையராஜா மிஸ்கின் இருவருக்கும் சாகாவரம் கொடுத்துவிடு!” என்று.  கொஞ்சம் மிகையாக தெரிந்தாலும் படம் பார்த்தபின் அந்த கருத்துக்கான நியாயமும், ஏற்புகளும் புரிந்தது. 

 

சினிமாவிற்கு வெளியேயும் ஒரு கலைஞனை காயப்படுத்தினால் அவன் தன் படைப்பின்  மூலமாகத்தான் பதில் சொல்வான். அந்த பதில் இந்த ஓநாயின் ஓலத்தில் இன்னமும் காதுகளுக்குள் எதிரொலித்தபடி இருக்கிறது. 

ம்ம்.. என்னவோ சொல்ல மறந்துவிட்டேன்.. ஆங்.. வழக்கம்போல இது எந்த படத்தின் காப்பி என மண்டையை குழப்பிக்கொண்டிருப்பவர்கள் பதினாலாம் நூற்றாண்டிற்கு ’கால இயந்திர’த்தில் ஒரு டூர் போய் வருதல் நலம்.

மூடர் கூடம் - திரைபட ஆய்வு(கூடம்)

இயக்கம்	நவீன்
தயாரிப்பு	WHITE Shadows
நடிப்பு	ஜெயப்பிரகாஷ் நவீன் ராஜா ஓவியா கிருஷ்ணா சென்ட்ரயன்
இசையமைப்பு	நடராஜன் சங்கரன்
ஒளிப்பதிவு	டோனி சான்
படத்தொகுப்பு	ஆதியப்பன் சிவா

’முட்டாள்’  என்ற வார்த்தைதான் இந்த உலகின் பெரிய கெட்டவார்த்தையாக நினைக்கும் குபேரன், தான் கஞ்சா விற்பதை கடவுள் கொடுத்த வரமாய் நினைக்கும் சென்றாயன்,  தன் தந்தையால் ஆளான மாமனை நம்பி சென்னை வந்து அவர் நாசூக்காய் வெளியே கிளப்பிவிட மீண்டும் தெருவுக்கே வந்த வெள்ளைச்சாமி (ஒயிட்).. இந்த மூவரும் போலீஸ் ஸ்டேஷனில் நட்பாகும் பெரும் பாக்கியத்தை பெற..இவர்களை வழிநடத்தும் பாக்கியம் (முன்னாள் சீர்த்திருத்த பள்ளி மாணவர்..) நவீனுக்கு  கிடைக்கிறது. 

இந்த நகரா!? வாழ்க்கையில் தமது அடுத்த காலை எங்கே ஊன்றுவது என்று யோசித்து நால்வரும் ஒன்றாய்  ’ஒயிட்’ன் மாமா வீட்டில் கொள்ளையடிக்க கிளம்புகின்றனர். மாமா ஜெயப்பிரகாஷ் வீட்டில் நுழையும்போது நடப்பதே வேறாகிவிட கொள்ளையடிக்க புது ரூட் போடுகிறார்கள்.  அதே வீட்டிற்கு வேறொரு ஆளுக்காய் சி.டி + பொம்மை  திருட வரும் ’மயில்ஸ்’ என்ற இன்னொரு கொள்ளையனும் களத்தில் இறங்க..  அதன் பின்னர் படம் முழுவதும் காமெடி மேளாவேதான்.

ஏதோ ஸீரியஸ் க்ரைம் த்ரில்லர் போல ஆரம்பித்து படம் நெடுக கிடைத்த கேப்புகளில் எல்லாம் காமெடி ரோல் கேப் பட்டாசை வைத்து வெடித்து விளையாடி இருக்கிறார்கள்.

படத்தின் ஸ்பெஷலே.. படத்தில் குறுக்கே ஓடும் நாய் முதற்கொண்டு அனைத்து கேரக்டர்களுக்கும் ஒரு முன்கதை சுருக்கம்தான்.அட்டகாசம். மெய்யாகவே  டைரடக்கர்தான். அதிலும் பொம்மைக்கு வரும் முன்கதைக்குக்கூட மெனக்கெட்டு வேர்வை சிந்தி சிந்தித்திருக்கிறார்கள்..

படத்தின் பெரிய பலமே காமெடியிலும் கனகச்சிதமான மெஸேஜ்களை சுமந்துவரும் வசனங்கள்தான்.  வெகு சில இடங்கள் மட்டுமே வெடித்து சிரிக்கும்படியாக இருந்தாலும் படம் முழுக்க நம்மை சிரிக்க வைக்கும் வேலையை சென்றாயன் சிறப்பாக செய்கிறார். 

தமிழ் கற்றுக்கொள்ளாததற்காக  சேட்டு, தாவூதின் ’சென்னைக் கிளை’  தலைவர் சலீம் பாயிடம் திட்டுவாங்குவது முதற்கொண்டு கிடைத்த இடங்களில் எல்லாம் கருத்து மழைதான்.  இருந்தாலும் ச’ளி’க்கவில்லை!.  

தமிழ் ரசிகர்களின் ஏகோபித்த கோபத்திற்கு ஆளாகிவிடாமல் இருக்க கடைசியில் ஒரு சென்டிமெண்ட் காட்சியைவைத்து கதையை பூர்த்தி செய்திருக்கிறார்கள்.

கதையை ஒரே ஸ்பாட்டில் வைத்திருந்தாலும், கதையே தனக்கு தேவையான ஆட்களை வெளியிலிருந்து உள்ளே இழுத்து வந்து கார் வர்க்‌ஷாப்பில் வைத்து ரிப்பேர் பார்த்து அனுப்பிவைக்கிறது. 

ஓவியாவை அவள் காதலனுடன் சேர்த்துவைத்துவிட்டு, அவனுக்கு தன் சட்டையும்

தாரை வார்த்துவிட்டு சென்றாயன் கொடுக்கும் லுக்கு இருக்கிறதே.. அடடா.. சூப்பர் பாஸ்..  அடுத்து இவரது ‘தபேலா வாசித்த கழுதை’ வந்து சேர்வதற்குள் இவர் கவனிக்கப்படும் இடத்திற்கு போய்விடுவார் போல.  வாழ்த்துக்கள் பாஸ்.

படத்தில் கொஞ்ச நேரமே வந்தாலும் ஆட்டொ குமார் அண்டு கோ நமக்குள் ஒரு சூப்பர் சவாரி போடுகிறார்கள். 

குழந்தைக்கு ஒரு வண்டி ஸ்நாக்ஸ் கொடுத்துவிட்டு ஜோடியாக குளிக்கபோகும் தம்பதிகளை கடைசியில்  ஒருவழியாக குளித்து முடிக்க வைத்தது ஒரு ஸ்பெஷல் குறும்பு எபிஸோடுதான்.

படம் நெடுக நகாசுவேலைகள் அட்டகாசம்.  ஆனாலும் நவீன் ஐந்து நிமிடங்களுக்கு ஒருமுறை  பதற்றமின்றி.. அது மிக அவசரமேயானாலும்.. நிதானமாக தத்துவம் பேசுவது சில இடங்களில் எரிச்சலை உண்டாக்குகிறது.  தேவையற்ற வசன விளக்கங்களை குறைத்திருக்கலாம். 

ஒளிப்பதிவு, கலை  என அனைத்தும் நிறைவு. 

பாடல் இசை, பின்னணி இசை நடராஜன். சில இடங்களில் கவன ஈர்ப்பு, வெகுசில இடங்களில் காது சவ்வு சிதைப்பு.  பனிஷ்மெண்ட் கொடுக்கபடும் அனைவருக்கும் அளித்த அமெச்சூர்தனமான ஒலிக்குறிப்பை தவிர்த்திருக்கலாம். 

படத்தொகுப்புக்கு சரியான தீனிதான். ஆதியப்பன் சிவாவிற்கு இரண்டாவது படம். KBKR முதலாவது. 

தியேட்டருக்கு குடும்பத்தோடு போய் குதூகலமாய் சிரித்துவரலாம்.. இந்த கோமாளிகள் கூடாரத்தில் சிரிப்பு சர்கஸ் கேரண்டி!

(விகடனார் மதிப்பெண் 44+ கொடுத்து விடுவார் என்று நம்புகிறேன்!) 

ஒரு மேலதிக தகவல்: கோவை குமரன் தியேட்டரில் இன்றும் பைக் டோக்கன் 5 ரூபாய்தான்.   ஸ்நாக்ஸ் @ MRP only!!

மரியான் - திரைக்க(தை)டல் அலசல்..

மரியான் - திரைவிமர்சனம்

.
CAST :  தனுஷ் (மரியான்),  ’பூ’பார்வதி (பனிமலர்),  ’நண்டு’ஜகன் (சாமி),  சலிம் குமார் (தொமய்யா ), உமா ரியாஸ்கான் (ஷீலி),  விநாயகன் (தெக்குரிஸ்ஸி),   அப்புகுட்டி (சக்கரை),   இமான் அண்ணாச்சி அப்புறம்.. ’டக்பெத்  ட்வே’ - ஆப்ப்பிரிக்கா வில்லன் மற்றும்  பலர்..

ஆக்கம்:  பரத்பாலா- இயக்கம்   A.R.R - இசை   ஒளிப்பதிவு : மார்க்  கோனின்க்ஸ்       (பெல்ஜியத்துக்காரர்)   தயாரிப்பு - ’ஆஸ்கார்’  வேணு ரவிச்சந்திரன்

திறமையான  நடிகர் பட்டாளம்,  நல்ல தயாரிப்பு நிறுவனம், துறை அனுபவம் வாய்ந்த இயக்குனர் என பெரிய எதிர்பார்ப்பை கிளப்பி சமயம் பார்த்து தியேட்டருக்குள் நுழைந்திருக்கிறான் ‘மரியான்’ .

திருநெல்வேலி கடலோர கிராமத்து இளைஞன் மரியான் என்கிற தனுஷ். கொம்பன் சுறாவையே வேட்டையாடும், தாயை மதிக்காத, நேரம் பொழுது முழுவதும் சுருட்டுப்பிடித்துக்கொண்டு, குடித்துக்கொண்டு திரியும் பாத்திரத்தில் அலைகிறார்.

காரணமே தெரியாமல் இவர் மீது கடும் காதலுடன்.. ’பனிமலர்’ எனும் பார்வதி.  இவருக்கு வேலையே தனுஷை கண்ட பொழுதெல்லாம் கசிந்துருகி காதல் பகிர்வதுதான்.

இயக்குனர் பரத்பாலா(1963)  என்ன நினைச்சு சொன்னாரோ, ஆஸ்கார் ரவிச்சந்திரன் கேமராவ தூக்கிட்டு கெளம்புங்கன்னு சொல்லியிருப்பார் போல.. போற வழியில ஸ்க்ரிப்ட் பேப்பர் நிறைய உருவி விழுந்துடுச்சு போல.. 

 

வில்லனுக்கு ஹீரோயின் பட்ட கடனை தீர்க்க ஹீரோ வெளிநாடு (சூடான்) போயி பொழப்ப பாக்குறாரு. இங்க நல்லாதானே சம்பாரிக்கிறாரு?? பின்னே ஏன்னு கேக்காம இருக்க முடியல. சூடான்ல போயி வேலைக்கு போறவழியில ஒரு தீவிரவாதி கும்பல் இவரை கடத்த..  தப்பிச்சு வந்தாரா?? இதுதான் கதை!.  இந்த ஒன் லைன், ஒரு நூற்றாண்டுக்கு முன் வந்த சினிமாவுக்கும் பொருந்தும்.

ஹீரோ கேரக்ட்ரைஸேஷன்ல பயங்கர குழப்பம். கதைல பல இடங்கள்ல லாஜிக் பொந்துகள், பல நேரங்கள்ல பல பல ரியாக்‌ஷன் மட்டுமே வாங்கப்பட்ட ஹீரோயின், சலிப்பை உண்டாக்கும் காட்சி அமைப்புகள் என பல பிரச்சினைகளுக்கு நடுவே பெரிய ஆறுதல் தனுஷின் முதிர்ந்த நடிப்பும், அதற்கு ஈடுகொடுக்கும் பார்வதியும், அங்கங்கே ஏ.ஆர்.ரகுமானும்தான். 

நல்ல கேமரா - அட்டகாசமான பதிவு. பாலை நிலங்களில் பல இடங்கள் ப்ளீச் - ப்ரொஜெக்‌ஷன் தரம்தான் மோசமோ.. கோவை யமுனா தியேட்டர். அடப்பாஸ் தியேட்டர்.. ஏசி போடாம கொன்னுட்டானுக. இதயெல்லாம் கேக்க ஆளே இல்லையா??.  

ஆரம்பத்தில் இலங்கை கடற்படையினரால் சுட்டுக்கொள்ளப்பட்ட இருவராகட்டும், பின் பாதியில் சூடானில் கடத்தப்படும் தனுஷ் என்ற பிரஜைக்கும், அவர்கள் குடும்பத்தாருக்கும் இந்திய அரசாங்கம் என ஒன்று இருப்பதே தெரியாது போலும். 

நெருங்கி வரும்போதெல்லாம் தனுஷிடம் தேவையின்றி உதைபடுகிறார் பார்வதி. வக்ரமான காட்சியமைப்புகள் எரிச்சலை வரவழைக்கின்றன. முன் பாதியில் கடல், பின் பாதியில் பெரும் பாலை என காண்ட்ரவர்ஷியல் பேக் ட்ராப்பில் புயலாய் செல்ல வேண்டிய கதை வறட்டுத்தனமாய் நகர்வது எரிச்சலை உண்டாக்குகிறது. 

வசனங்கள் உச்சரிப்பில் திருநெல்வேலி, நாகர்கோவில், மதுரை என பல ஊர் வாடை குழப்பம் வேறு. பொறுப்பற்ற படைப்பு. 

கடல்தான் நாயகனின் தாய். அங்குதான் அவன் முழுபலத்துடன் இயங்குவான் என்ற கான்செப்ட்டிற்காக ஹீரோவையும், வில்லனையும்  கடல் கண்ணில் படும்வரை உருட்டி புரட்டி கொண்டுவந்து சேர்த்து மோதவிட்டிருக்கிறார்கள். 

பாலை நெடுக வரும்  ஹீரோவிற்கு பாலைவனத்தில் இடது காலில் காயம் உண்டாகிறது. கால்கட்டை வலதுகாலுக்கும் இடது காலுக்கும் மாற்றி மாற்றி குழப்பும் கண்டின்யுட்டி மிஸ்டேக் ஒன்று போதும் படத்தின் பெர்ஃபெக்‌ஷனை எடுத்துச்சொல்ல.. 

நடுவுல நம்மூரு ஸ்டைல்ல ஆப்ரிக்கா வில்லன்களுக்கு ஒரு அயிட்டம் ஸாங்கு கொடுமை வேற.

டைரக்டர்களின் நடிகன் தனுஷ்.. இந்த படத்தில் இயக்குனரின் மொக்கைத்தனம் புரிந்து போய் ஒரு நிலையில் தானே நடிக்கத்துவங்கியிருப்பார் போல.. சமாளித்து படத்தை கடைசிவரை சுமந்து சென்றுள்ளார். அவ்வளவுதானே அவரின் எல்லை. 

ஒரு நல்ல இயக்குனரின் கையில் கிடைத்திருந்தால் மரியான் இன்னமும் சிறப்பாக வந்திருப்பான் போல. 

பின்னணி இசை - சுமார் ரகம்தான்.  பாடல்கள்தான் படத்தின் ப்ரொமோஷனுக்கு பலம், அதேதான் பார்க்கையில் பலவீனம்.. 

படம் ஒருபுறம் நடக்க, மக்கள் தியேட்டரில் தங்களுக்குள் பேசிக்கொண்டு இருக்கும் அளவிற்குதான் படத்தின் சுவாரஸ்யம்.

முப்பது கோடி பட்ஜெட் - இன்றைய இளம் தலைமுறை இயக்குனர்களிடம் கொடுத்தால், பத்து நல்ல படங்கள் கிடைக்கும் - இது அந்த ஆஸ்கார் ரவிச்சந்திரன் அவர்களுக்கான தகவல்.

நேரம் - (காலம்) கடந்து ஒரு விமர்சனம்..

படத்தின் கான்செப்ட்டே நல்ல நேரம் கெட்ட நேரம் சம்பந்தமானதுதான். ஆனா படம் பாத்த நொடியில இருந்து இந்த பதிவ

போட நேரம் கிடைக்காம அலைஞ்சது என்ன வகையான நேரம்னுதான் தெரியல.

’உலக சினிமா வரலாற்றிலேயே புதுமை எதுவும் இல்லாத திரைப்படம்’  போஸ்டர்லயே போட்டு ரவுசு பண்ணின டைரக்டர் படத்துலயும் நிறைய அலும்பு பண்ணி வெச்சிருக்காரு.

 

போன சூது கவ்வும் படத்துலயே நேரம் படத்துக்கான எனது எதிர்பார்ப்பை சொல்லி இருந்தேன்.. இந்த டைரக்டர் அல்போன்ஸும்  நலன், பாலாஜி, கார்த்திக் படங்களுக்கு வெட்டி ஒட்டும் வேலைய பாத்தவர்தான்.. 

என் நம்பிக்கை வீண் போகலை.. 

தட்டத்து மறையத்து.. மலையாளம் ப்ளாக் பஸ்டர் மூவியின் நாயகன் நிவின் பாலி..  இந்த ட்யூயல் மேக்கிங்ல ரெண்டு வெர்ஷன்லயுமே ஹீரோவா நடிச்சிருக்காரு.. செம பர்ஃபாமென்ஸ்.. வினித் சீனிவாசன் ஸ்கூல் ப்ராடக்ட் ஆச்சே!?.

இன்ப அதிர்ச்சியா நஸ்ரியா.. இத்தனை நாள் இந்த பொண்ணு எங்க இருந்தாளோ??  கேரளா டிவி ஆங்கராமா.. MUNCH ஸ்டார் சிங்கராமா..   அவ்ளோ அழகு!. ’ஒரு நாள் ஒரு கனவு’  படத்துல ஒரு ரோல் பண்ணதா ஞாபகம். நடிப்புல இம்ப்ரூவ்மெண்ட் இருந்தா... ம்ம்.. அதெல்லாம் கூட வேணாம் பொழைக்கத்தெரிஞ்ச பொண்ணா இருந்தா எல்லா உட்லயும் ஒரு ரவுண்டு வரலாம்..  சினிமா உலகம் அப்படித்தான் இருக்கு.. 

சரி.. படத்துக்கு போவோம்..

அமெரிக்காவுல தேள் கொட்டுனதால இங்க இருக்குற ஒரு கம்பெனியில நெரி கட்டுது..ஹீரோவுக்கு வேலை போயிடுது.  தங்கச்சி கல்யாணத்துக்கு சிம்ஹா கிட்ட கடன் வாங்கி மூணு மாசத்துல செட்டில் பண்ண வாக்கு ’வட்டி’யுறுதி தர்றாரு..

கடைசீ நாளு.. 

 

இந்த நேரத்துலதான்  சின்ன வயசுலர்ந்து பழகி.. ’பெருசான’ பின்னாடி கன்ஃபார்மா ஃபிகர்தான்னு உறுதிபண்ணி ஹீரோ காதலிச்சு   வந்த தம்பி ராமையா மகளும் இவனை நம்பி வீட்டை விட்டு வெளியேறி ஹீரோ வெற்றிய தேடி வர்றாங்க.  (ஏன் டைரக்டர் சார்.. விளையும் பயிர் முளையிலேயே தெரியும்னு சொல்வாங்களே.. இந்த பழமொழி பொய்யா சார்? ஹீரோ ‘இவ இவ்ளோ ஃபிகரா வருவான்னு எதிர்பாக்கல”ன்னு சொல்றாரே? ) 

  

அன்னைக்கு வட்டி ராஜாவுக்கு பணத்த செட்டில் பண்ணாரா?  வட்டி க்ரூப்பால  கடத்தப்பட்ட ஹீரோயின காப்பாத்துனாராங்கறதுதான் மீதிப்படம்.

படம் என்னவோ செமயா இருந்தாலும் இப்படி கதைக்கான முடிச்சுகளைப் போட முதல் பாதி வரை முழுசா  ’நேரம்’ எடுத்து நம்மை சோதிச்சு இருக்காரு. 

ஆனா ’கதைச்சொல்லி’களாக இருந்த  சினிமா இயக்குனர்களுக்கு நடுவே,  இதுபோல சம்பவங்களை சினிமாவாக சொல்ல வந்த இந்த தலைமுறை இயக்குனர்களுக்கு சபாஷ் சொல்லிதான் தீரணும். 

இரண்டாம் பாதில இந்த 'Lag' ஐ எல்லாம் சரிகட்டும்விதமா படத்த விறுவிறுப்பா கொண்டுபோனதுல படம் ஜாலியா முடிஞ்சுடுது.. 

காஸ்டிங்ல அக்கறை காட்டியிருக்கும் இயக்குனர், கொஞ்சமே கொஞ்சம் கேரக்டர்களுக்கு நடுவே கதைய நகர்த்தினாலும், ஒவ்வொரு நடிகர்கள்ட்டயும் சிறப்பா வேலை வாங்கி இருக்காரு. தம்பிராமையா, சார்லி, நாசர், சிம்ஹா எல்லாருமே சிறப்பா பண்ணியிருப்பது படத்தின் பெரிய ப்ளஸ்.

முதல் ப்ரிவியூவுலயே ரெட் ஜெயண்ட் மூவீஸ் படத்த வாங்குனது சினிமா வட்டார பரபரப்பு.. 

பாடல்கள் ஹிட்டு.. RR  ராஜேஷ் முருகேசன்.. நல்லாதான் பண்ணியிருக்காரு. அதுவும் அந்த முக்கா மொழம் ப்ரொமோ பாட்டு அதிரி புதிரிதான்.

கேமரா.ஆனந்த்.சி.சந்திரன்..ஒளிப்பதிவு நல்லாவே இருக்கு ஆனா,  கட் இல்லாம நல்ல லென்த்தி ஷாட்கள் எடுக்கறதுதான் ட்ரெண்டுன்னு கெளப்பிட்டாங்க போல.  இந்த மாதிரி ஷாட்கள் எல்லாம் குறும்படங்கள் பாக்குற உணர்வைதான் உண்டாக்குது. காட்சிக்கு அவசியம்னா மட்டும் செய்யுங்கப்பா. மற்றபடி வழக்கமான சினிமா பாணிதான் சரி.   

கொடுத்த காசுக்கு வஞ்சனை இல்லாம எஞ்சாய் பண்ணிட்டு வரலாம்.  

நன்றி..

அயராது முயன்றால் பிழையின்றி எழுதலாம்..

அதைத்தான் நானும் முயற்சி பண்ணிட்டிருக்கேன்..

வணக்கம் ட்விட்டர்/சந்து வாழ் மக்களே!!

முதலில் ஒரு தன்னிலை விளக்கம்:-

      பிழைதிருத்தி என்ற பெயரை சுமப்பதால் நான் தவறே செய்யாதவன் என்ற பொருள் கொள்ளவேண்டாம்.. உதாரணமாக பிழைகளை திருத்த உதவும் இந்த பதிவில் எத்தனை பிழை நேரப்போகிறது என்பது அவனுக்கே வெளிச்சம்..

மற்றபடி பிழைதிருத்தி என்பது இந்த சமூகத்தின் பிழைகளை திருத்த நான் மேற்கொள்ளும் முயற்சிகளுக்கு வைத்துக்கொண்ட பெயர் என்று நீங்களாகவே ’காமாசோமா’வென்று முடிவெடுத்தால் அதற்கு கம்பெனி பொறுப்பல்ல.

இங்கு நான் சொல்ல முயல்வது எல்லாம் நம் சகட்விட்டர்கள் சகட்டுமேனிக்கு சரளமாக செய்கின்ற, என் சிற்றறிவிற்கு எட்டிய பிழைகளை சுட்டிக்காட்டத்தான்.. (உனக்கு எதுக்கு இந்த அப்பாடக்கர் வேலை??? என்று என் மூக்கில் குத்துபவர்களுக்கு.. என் பதில்..  இன்று போய் நாளை ’வாரு’ங்கள்.. என்பதுதான்..)

பிழைகள் பல்வகை!!

      அடிப்படை இலக்கணத்துக்கான குறைந்தபட்ச அறிவும், உங்களுக்குள்ளே வாதிடும் குணமும் இருந்தாலே தமிழ் உங்களுக்கு வசப்படத்துவங்கும்…

வல்லினம்    6 எழுத்துக்கள்  -   க ச ட த ப ற

மெல்லினம்   6 எழுத்துக்கள்  -   ங ஞ ண ந ம ன

இடையினம்   6  எழுத்துக்கள்  -  ய ர ல வ ழ ள

இதை ஞாபகம் வைத்துக்கொள்வது நல்லது..

ஒலி உணர்வில் ஒரே போன்று ’ன’ ‘ண’ ‘ந’ மற்றும் ’ர’ ‘ற’ இடமாற்றுப் பிழைகளை தொடர்ந்து வேறுபாடு அறிந்து படித்து எழுதுவதன் மூலமே தெரிந்துக்கொள்ள முடியும்..

உ.ம்: எரி – எறி.. உரிய (ஒன்றுக்கு சொந்தமான..) – உறிய (உறிஞ்சுதல்..)

அடுத்து சந்திப்பிழைகள்தான்..

சந்திப்பிழைகள் – பெரும்பாலும் ஒருமை பெயருக்கு பன்மை வினைச் சொல்லைக் கொண்டு முடிப்பது.. அதேப்போல பன்மை பெயர்ச்சொல்லுக்கு ஒருமையில் முடிப்பது.. மேலும் உயர்திணை பெயருக்கு அஃறிணை வினைக்கு உயர்திணை வினை என முடிப்பதுதான்.

1.   முதலில் தெரிந்துக்கொள்ள வேண்டியது, ‘ற்’ என்ற வல்லின மெய்யின் அடுத்து எந்த மெய்யெழுத்தும் சேர்க்கக் கூடாது..

உதாரணம் :  பயிற்ச்சி தவறு.. பயிற்சிதான்.. அதைப்போலவே  செயற்க்கை அல்ல செயற்கைதான்..  இயற்க்கை  - இயற்கை

இது புரிந்திருக்கும்.. அதேப்போல ’ற்’ என்ற இந்த வல்லின மெய் எந்த சொல்லின் இறுதியிலும் தொக்கி நிற்காது.. மற்ற எந்தவொரு மெய்யும் இறுதி எழுத்தாக வரலாம்..

     

2.   அடுத்து எப்போதெல்லாம் மெய்யெழுத்து சந்தியாக வரலாம் வரக்கூடாதென்பதை புரிந்துக்கொள்ளுதலும் நலமே..

பசிபிணி.. பசிப்பிணி இரண்டில் எது சரி..??

பசிபிணி – பசியும் பிணியும் என்று பிரித்து படிக்க வாய்ப்பு இருப்பது தெரிகிறதா..

ஏற்கனவே ஏடாகூடமாய் கருத்துப் புரிதல் கொண்ட நம் இணைய மக்களுக்கு இப்படியெல்லாம் வாய்ப்பு கொடுக்கக் கூடாது. அதனால் பசிப்பிணி என்று வார்த்தையை அழகாக முடித்தல் நலம். பசியாகிய பிணி என்று பசி ஒரு நோயாக உருவகப்படுத்தியுள்ளது புரிகிறதா..

ஸோ ஸிம்ப்பிள்..

சந்தி இல்லாமல் சேரும் வார்த்தைகள் சேர்த்து உச்சரித்தால் அது வேறு பொருள் தருமா என சொல்லிப்பாருங்கள்.. தருமாயின் சந்தியை கோர்த்துவிடல் நலம்..

உதாரணம்.. ’வெட்டுக்குத்து’.. ஆஹா.. இது கொஞ்சம் ரணம்தான்.. வேற எதாவது சொல் எடுத்துக் கொள்ளலாம்.. (எடுத்துக்கொல்லலாம்னா அர்த்தமே மாறிடும்..)

தட்டுப்பாடு.. இதை தட்டுபாடு என்று எழுதினால் என்னவாகும்??

தட்டிக்கொண்டே பாட்டு பாடுதல் என்ற பொருளை கொள்ளுமல்லவா..

தட்டுப்பாடு என்றால் பஞ்சம் என்று நேரடியாக சொல்லி மேட்டரை முடித்துவிடலாம் இல்லையா?

பட்டுப்போனது.. பழசாய்டுச்சு / பட்டுபோனது பட்டு விற்றுபோனது, இனி என்னவெல்லாமோ பொருள் வருமே!!

அந்நிய மொழியினை நேரடியாக எழுதுவதில் இவ்வளவு மெனக்கெட வேண்டியது இல்லையாயினும் அதிலும் பொருள் மாறாமலிருக்க  கொஞ்சம் கவனம் தேவைப்படுகிறது..

க ச ட த ப ற ஆறு வல்லின சொற்களில் இந்த ட வும் ற வும் சொல்லின் முதலில் வராது..  க ச த ப நான்கெழுத்துக்கள் மட்டுமே சொல்லின் முதலில் வரும்..

கன்னி, சங்கு, தப்பட்டை, பாடை – யதேச்சையான உதாரணங்கள்தான்.. முதலில் உள்ளதை ஆராய்ந்தபடி இருந்தீர்களேயானால் பின்னால் உள்ளவை தானாக உம்மைச்சேரும்..  ச்சும்மா ஜாலிக்கு..  அப்புறம் இந்த சொல்லில் உள்ளதைபோல் எந்த மெய்யெழுத்துக்களும் சொல்லின் முதலில் வாரா.. இது ச்சும்மா ஜாலிக்கு..

3.   அடுத்து.. சுட்டெழுத்துக்கள் அ இ உ மூன்று மட்டுமே.. (உ எப்படி சுட்டெழுத்து என்று கேட்கிறீர்களா? உப்பக்கம் என்றொரு சொல் திருக்குறளில் வருகிறது.. இன்று ’உ’ வை பயன்படுத்தி வேறு எந்த சுட்டுச்சொல்லும் என் நினைவில் இல்லை..)

’அ’ ’இ’ ’உ’ சுட்டெழுத்துக்களும், எ என்ற வினா எழுத்தும் தனியாகவோ,சொல்லின் கடைசியில் இயம்பி வேறு சொல்லுடன் புணர்கையில் அது வல்லின எழுத்தில் துவங்கும் சொல் என்றால் (க ச த ப ) அந்த இடத்தில் வல்லினம் மிகும்..

அதாம்ப்பா.. அ + கரை, இதில் அ கரை என்ற சொல்லுடன் சேர்கையில் அக்கரை என்று வரும்.. க என்ற வல்லினம் க் எக்ஸ்ட்ராவாக வந்துள்ளது புரிகிறதா..

வந்துச் சென்றான் (து –வில் த் + உ / செ வில் ச் மிகுந்து உள்ளது)

குற்றப்பத்திரிக்கை (ற – ற் + அ / ப வில் ப்..)

4.   அடுத்து  ’ய்’ என்ற மெய்யெழுத்தின் அடுத்து வரும் வல்லினம் மிகும்..

உ.ம்: பொய்ப்பிரச்சாரம்.. ஓநாய்க்கிழவன், வாய்ப்பாட்டு இன்னும் நிறைய..

5.   அதேபோல ’ஐ’காரம்.. ஐ! காரம் இல்லை...

ஐகாரத்தினை தொடர்ந்து வரும் மெய்யெழுத்து மிகும்..

கீழைக்காற்று (ழை – ழ் + ஐ)

கைத்தொழில் / தைப்பூசம்

6.   ஒரு வினைச்சொல் ‘இ’ ’ய்’ ’ஆ’ ’ஊ’ ’என’ ’அ’ எழுத்துக்களில் முடிந்தால் அதன் அடுத்துவரும் சொல்லின் முன் வரும் மெய்யெழுத்து மிகும்..

(மிகும் மிகும்னே சொல்லுற இடத்துல எல்லாம் மெய்யெழுத்து எக்ஸ்ட்ரா போட்டுக்கணும் :0)

ஓட்டிச்சென்றான்  (டி = ட் + இ வருதா? அதான் ச் மிகுந்து வந்துடுச்சு..)

நெய்ப்பானை      (ய் வந்ததால பாவுல இருக்கும் ப் மிகுந்து வந்துட்டு..)

கூவாக்குயில்     (வா = வ் + ஆ )

உண்ணூச்சென்றான் (ஊ)   மெல்லத்தவித்தாள் (த்+அ)

பட்டெனச்சொல்கிறார் (என)

புரிஞ்சிருக்கும்னு நெனக்கிறேன்..

7.   எதிர்மறை வினையெச்சம் (ஓடாது, பிடித்து ) மற்றும் எதிர்மறை பெயரெச்சங்கள் (சொல்லா.., அறியா..  ) போன்ற சொற்களின் அடுத்த சொல்லில் வரும் வல்லின மெய் மிகும்..

ஓடாதுக்கிடக்கும் / பிடித்துப்போட்டான்

க் ப் மிகுந்து வந்துள்ளது தெரிகிறதா..

8.   இரண்டாம் வேற்றுமை உருபு ’ஐ’ என்ற எழுத்தின் அடுத்து வரும் வல்லினம் மிகும்.

பிழையைத் திருத்தினான்,

இதுவே பெயர்ச்சொல்லாக உருவெடுக்கையில் பிழைதிருத்தி.. பிழையை திருத்துபவன் என்று உருவகப்படுவதால் வல்லினம் மிகவில்லை..

(குறிப்பு: சந்தி இடம்பெறும் சொற்களைச் சேர்த்து எழுதுதலும் பிரித்து எழுதுதலும் வசதியினைப் பொறுத்தது.. அதைக்குறித்து கவலைப்படவேண்டாம்)

9.   என இனி என்ற சொற்களின் அடுத்துவரும் வல்லினம் மிகும்..

லொள்ளெனக் குரைத்தான், சிட்டெனப் பறந்தான்,

இனித் தடங்கல் இல்லையெனக் கொள்..

10.  நான்காம் வேற்றுமை உருபு ‘கு’வின் அடுத்து வரும் வல்லினம் மிகும்..

சந்தைக்குச்செல்கிறேன்.. ‘கு’வின் அடுத்து ச் மிகுந்துள்ளது..

(இந்த வேற்றுமையுருபு சமாச்சாரத்த இன்னொரு பதிவுல சொல்லுறேன்..)

கடைசியாக..

உரிச்சொல்.. அதாவது அடுத்துவரும் சொல்லுக்கு பில்டப் கொடுக்கும் சொல்

’உரிச்சொல்’ என்று சொல்லப்படும்..

.

சாலச்சிறந்தது..  இதுல சால என்பது உரிச்சொல்..

மேலே சொன்ன பத்து மேட்டர நல்லா உள்வாங்கிட்டீங்கன்னா.. சந்திப்பிழை வராதுன்னு ஆணித்தரமா நம்பலாம்..

இன்னும் கொஞ்சம் சரி / தவறுகளை இதுல சொல்லுறேன்.. முடிஞ்சா மைண்ட்ல வெச்சுக்கங்க..

   பிழை                                    திருத்தம்

உடமை                                 உடைமை    

அதாவது                                அஃதாவது    

அழும்பு                                 அழிம்பு            

இரும்பல்                                இருமல்

அருகாமையில்                          அருகில்

கைமாறு                                கைம்மாறு

கருவேப்பிலை                           கறிவேப்பிலை

கடப்பாறை                              கடப்பாரை

என்னமோ ஏதோ                         என்னவோ ஏதோ

(இந்த பாட்டுக்கு கார்க்கிக்கு அவார்டெல்லாம் கிடைச்சது தனிக்கதை..)

ஒருக்கால்                               ஒருகால்

எண்ணை                               எண்ணெய்

ஊர்ச்சுத்தி                               உகிர்ச் சுற்று

கோடாலி                                கோடரி

கோமியம்                               கோமயம்

கோர்வை                               கோவை

சந்தணம்                                சந்தனம்

தொப்புள்                                கொப்பூழ்

மோந்து                                 முகர்ந்து                                

பொதுவுடமை                           பொதுவுடைமை

சமயல்கட்டு                             சமயற்கட்டு

துடக்கம்                                துவக்கம் / தொடக்கம்

மென்மேல்                              மேன்மேல்

ஞாயம்                                  நியாயம்

பதட்டம்                                 பதற்றம்

வல்லுனர்                               வல்லுநர்

சுதந்திரம்                                சுதந்தரம்

எந்தன் /உந்தன்                          என்றன் / உன்றன்

சிலது / பலது                            சில / பல

மோர்ந்து                                முகர்ந்து

அப்புறம் கீழே உள்ள சொற்கள் இரண்டுவிதமாக எழுதினாலும் தவறில்லை..

அக்கரை – அக்கறை / சில்லரை –சில்லறை / சலங்கை – சதங்கை / சேலை –சீலை / மதிள்சுவர் - மதில்சுவர் / மங்களம் – மங்கலம் / முறிந்தது – முரிந்தது/ ஆணை – யானை / வரட்சி –வறட்சி / மெல்ல –மெள்ள / எந்திரம் –இயந்திரம் / நடத்து –நடாத்து / உருண்டை – உண்டை / உழுந்து – உளுந்து /ஊசல் –ஊஞ்சல் / சிவப்பு – சிகப்பு

எழுதும் முறைகளிலும் சில பிழைகள் நேர்கின்றன..

சந்திகள் அல்லாது வரும் சொற்களை பிரித்து எழுதுவதால் பொருள் மாறும் வாய்ப்புகள் அதிகம்..

இவர் கள் குடிக்கிறார்கள்  - இவர்கள் குடிக்கிறார்கள்

அவன் இடம் கேட்டேன் – அவனிடம் கேட்டேன்

செல்லவேண்டும் ஆனால் – செல்லவேண்டுமானால்

பிரித்து எழுதி படிப்பவரை இம்சிக்காமல் இருப்போம்..

எழுதியதை மீண்டும் ஒருமுறை வாசித்துப்பார்த்தல் நலம்.. அப்படியும் எதுவும் தவறு தெரியவில்லை என்றால் அவ்வையார் ஆரம்ப பாடசாலையில் இடம் பிடிக்க நாள் பார்க்க வேண்டியதுதான்..

இனியென்ன.. இந்த பதிவில் கண்ட பிழைகளை கமெண்டுகளாக போட்டுத் தாக்குங்கள்..

அடுத்த பதிவில் சந்திப்போம்..

நன்னி,

கணேஷ் நாராயணஸ்வாமி

@pizhaithiruthi